چینی کمپنیوں نے پاکستان سے گدھے کے گوشت کی برآمد کی اجازت مانگ لی

دو چینی کمپنیوں نے پاکستان سے گدھے کے گوشت اور ہڈیوں کی برآمد کے لیے سلاٹر ہاؤس اور برآمدی لائسنس کی درخواستیں جمع کرا دی ہیں۔

وزارت فوڈ سیکیورٹی کے حکام کے مطابق درخواستوں پر مکمل چھان بین جاری ہے، اور تمام قانونی تقاضے پورے ہونے کے بعد گوشت اور ہڈیاں چین برآمد کی جا سکیں گی۔

حکام کا کہنا ہے کہ گدھے کا گوشت صرف بلوچستان کے گوادر سے برآمد ہوگا تاکہ اس کی مقامی مارکیٹ میں فروخت کو روکا جا سکے۔ اس برآمد سے پاکستان کو قیمتی زرمبادلہ حاصل ہونے کی توقع ہے۔

مزید انکشاف کیا گیا ہے کہ اسلام آباد میں ایک غیر ملکی شخص لائسنس کے بغیر گدھے کے گوشت کا غیرقانونی کاروبار کر رہا تھا، جس کے خلاف کارروائی کی جا چکی ہے۔